სკი ტური, ასევე, ცნობილი, როგორც „ბექქანთრი სკი“ გულისხმობს თხილამურით ან სნოუბორდით მთაზე სპეციალური აღჭურვილობით ასვლასა და გაუკვალავ თოვლში დაშვებას.

ბოლო წლებში, სკი ტურის თხილამურით სრიალი უფრო პოპულარული გახდა. მოთხილამურეებისა და სნოუბორდისტების ნაწილი ზამთრის კურორტებზე საბაგიროს რიგში დგომასა და ერთსა და იმავე ხალხმრავალ მარშრუტზე სრიალს ამჯობინებენ კურორტის გარშემო მრავალფეროვანი რელიეფის ათვისებას, სადაც მეტი თავისუფლებაა.

საქართველოში სკი ტურისთვის ძალიან ხელსაყრელი ბუნებრივი პირობებია, თუ არ ჩავთვლით, ბოლო დროს, თოვლის სიმცირეს, რომელიც გლობალური დათბობითაა გამოწვეული.

სკი ტურის პოპულარობის მიზეზების კვალდაკვალ

• თავისუფლება და გაუკვალავში სრიალი. სკი ტურის მზარდ პოპულარობას საზოგადოებაში ჯანსაღი ცხოვრებისა და გარემოს დაცვის იდეის აქტუალობა განსაზღვრავს. ქალაქში მცხოვრები ადამიანები ხშირად ახალ თავგადასავალსა და შეგრძნებებს ეძებენ. სკი ტური ხომ არჩევანია, მოშორდეთ სათხილამურო კურორტებს, ახალ ადგილებში იმოგზაუროთ და ხელუხლებელი ბუნებით დატკბეთ;

  [gallery size="full" columns="2" ids="75260,75293"]

• ფიზიკური დისტანცია. COVID-19-ის პანდემია სკი ტურის პოპულარიზაციის კატალიზატორი გახდა - როგორც ხშირად გადატვირთული ან დაკეტილი და ზედმეტად ხარჯიანი კურორტების კარგი ალტერნატივა. იმის გამო, რომ სათხილამურო კურორტების უმრავლესობა დაიკეტა და ფიზიკური დისტანცია სავალდებულო გახდა, სკი ტური კარგად მოერგო ამ გარემოებას, ვინაიდან ამ შემთხვევაში, სოციალური დისტანციის დაცვით, საბაგიროების გარეშე, დამოუკიდებლად სრიალი იყო შესაძლებელი.
• ინფორმაციის ხელმისაწვდომობა და სწორი აღჭურვილობა. სკი ტურის განვითარების კიდევ ერთი მიზეზი ინფორმაციისა და აღჭურვილობის ხელმისაწვდომობა, მისი გამოყენების სიმარტივე და უსაფრთხოების გაუმჯობესებაა. თანამედროვე ტექნოლოგიებმა და მეცნიერულმა მიღწევებმა სათხილამურო აღჭურვილობა დახვეწა და უფრო მოხერხებული გახადა: თხილამური, სპლიტბორდი, ტექნიკური ტანსაცმელი და აღჭურვილობა საზვავე უსაფრთხოებისთვის - ყველაფერი უკვე ხელმისაწვდომია და თან მისი შეძენა შესაძლებელია, როგორც ადგილობრივ ფიზიკურ თუ ონლაინ მაღაზიებში, ისე სხვა ქვეყნებიდან ონლაინ გამოწერის გზით;
• რეკომენდაციები. გარდა ამისა, ჩვენ ირგვლივ ისეთი ადამიანებიც გამოჩნდნენ, რომლებმაც წლებია უკვე, ამ მიმართულებით, სათანადო გამოცდილება დააგროვეს და მზად არიან, აღჭურვილობის შერჩევასთან დაკავშირებული პროფესიული ცოდნა თუ მეგობრული რჩევები სიამოვნებით გაგიზიარონ.

https://www.instagram.com/reel/CmrYHFBIdPT/?utm_source=ig_web_copy_link

სკი ტურის დაგეგმვა
სკი ტურის შესაძლო მარშრუტების შესახებ ინფორმაცია ონლაინაც ხელმისაწვდომია. მიუხედავად ამისა, თქვენთვის უცნობი ადგილების ასათვისებლად აუცილებელია ადგილობრივი, გამოცდილი გიდი დაიხმაროთ. მიზეზი კი, პირველ რიგში, თქვენივე უსაფრთხოებაა. საქართველოში სკი ტურზე გამყოლი გიდის პროფესიაც, მზარდი მოთხოვნის გამო, ძალიან პოპულარული გახდა.

სკი ტურით ჯგუფური მოგზაურობისას, მარშრუტისა და ამინდის შესახებ ინფორმაციის წინასწარ განსაზღვრა აუცილებელია. ასევე, კრიტიკულად მნიშვნელოვანია, ჯგუფის წევრებს შორის, სრული კოორდინაცია. სკი ტურით მოგზაურობისას მონაწილეები ხშირად განიცდიან საერთო პასუხისმგებლობის გრძნობას. ეს მათ ძალიან აახლოებს და აერთიანებს. სკი ტურის დროს, როგორც წესი, ხშირადაა შემთხვევა, როცა არაპროგნოზირებად გარემოში ჯგუფი ერთ კონკრეტულ გადაწყვეტილებამდე უნდა მივიდეს.

სკი ტური, ასევე, პირადი წარმატებისა და დიდი დაბრკოლების გადალახვის განცდით მიღებული სიამოვნების წყაროცაა. რთულ რელიეფზე სრიალი და კარგი თოვლის კონდიციის აღმოჩენა სიამაყისა და სიხარულის მომგვრელია.

უსაფრთხოებაზე ზრუნვა
ვინაიდან სკი ტურით დაინტერესება იზრდება, მნიშვნელოვანი საკითხი, რომელიც განსაკუთრებულ ყურადღებას მოითხოვს, უსაფრთხოებაზე ზრუნვაა. ზვავებმა, ციცაბო რელიეფმა და ამინდის მოულოდნელმა ცვლილებამ, შესაძლოა, მოგზაურობა უცებ ძალიან სახიფათო გარემოდ გარდაქმნას. გიდის გარეშე, სკი ტურის დამოუკიდებლად მოძრავი ჯგუფის წევრებს უნდა ჰქონდეთ სათანადო საზვავე მომზადება და აღჭურვილობა, მათივე უსაფრთხოების უზრუნველსაყოფად. გარდა ამისა, ასევე, უნდა ერკვეოდნენ ადგილის სპეციფიკასა და შესაძლო საზვავე რისკების მინიმიზაციის გზებში.

სკი ტურის გავლენა გარემოზე
ერთადერთი, რაც შეიძლება, სკი ტურის შედარებით ნეგატიურ ეფექტად მიიჩნიო, სკი ტურით სრიალის გარემოსდაცვითი ეფექტია. აქ არ არის საუბარი  ნარჩენებით დანაგვიანებაზე, რაც კურორტების, ჯერ კიდევ, მოუგვარებელ პრობლემად რჩება. ამ შემთხვევაში, იგულისხმება, რომ რაც უფრო მეტი ადამიანი სტუმრობს მიუვალ ადგილებს, არსებობს საფრთხე, რომ მგრძნობიარე ეკოსისტემები და მათ შორის, გარეული ცხოველები (რომლებსაც ადამიანის გამოჩენა აფრთხობთ) მით უფრო დაზარალდებიან და სრულიად გადაშენდებიან. შესაბამისად, აუცილებელია, სკი ტურის ჯგუფის წევრებმა იცოდნენ მათი გარემოზე ზემოქმედების რისკების შესახებ და მარშრუტების სწორი დაგეგმვით, ეკოსისტემაზე გავლენა მაქსიმალურად შეამცირონ.

და ბოლოს...
თანამედროვე მიდგომებმა თოვლში მოგზაურობა ბევრად გააადვილა. სწორად შერჩეული და კარგად მორგებული აღჭურვილობა ნაკლებ ფიზიკურ მომზადებას და კონდიციას საჭიროებს, უფრო ზუსტად კი, ნებისმიერი ადამიანისთვის თავისი დონისთვის შესაძლებელ მარშრუტზე გადაადგილებას კომფორტულს ხდის. ვინც ერთხელ მაინც ცადა სკი ტური, დაეთანხმება იმ აზრს, რომ ძნელია, სუფთა ჰაერზე ვარჯიში დარბაზში მიღებულ გამოცდილებას შეადარო. მთაში კარდიოდატვირთვის დროს, ფიზიკური კონდიცია შესამჩნევად სწრაფად უმჯობესდება, დარბაზის ნებისმიერ სხვა აქტივობასთან შედარებით.

სკი ტურით სრიალი შეიძლება, იყოს ძალიან სასიამოვნო და პოზიტიური გრძნობებით სავსე გამოცდილება იმ ადამიანებისთვის, რომლებიც მზად არიან, დაბრკოლება გარკვეული ჯგუფური მომზადებითა და სათანადო დისციპლინით დაძლიონ.

დარწმუნებული ვარ, სკი ტური კიდევ უფრო განვითარდება და ხელს შეუწყობს როგორც ჯანმრთელი საზოგადოების ჩამოყალიბებას საქართველოში, ასევე ეკოტურიზმის განვითარებას, რომელიც ნაკლებად დააზიანებს გარემოს, ვიდრე ინდუსტრიული ტრადიციული დიდი სათხილამურო კურორტები.

სასარგებლო ბმულები:

ზვავსაწინააღმდეგო აღჭურვილობა;
საზვავე უსაფრთხოების Youtube-არხი;
სამთო გიდები;
მარშრუტების რუკა;
ადგილობრივი სკი ტურის FB-ჯგუფი;
GoPro Club Georgia

ავტორი: ბაჩია ბიძინა გამცემლიძე
ფოტო-ვიდეოკრედიტი: Gorillas' Production